O fatídico anuncio por parte de Alcoa colleu por sorpresa ás case 400 persoas que traballan na factoría coruñesa. Despido colectivo ao total da plantilla. Coa decisión xa tomada, desde a multinacional anunciaron que iniciarán agora un “proceso de consultas” coa representación sindical.
En todo caso, a representación sindical reaccionou inmediatamente desbotando os motivos esgrimidos polo xigante do aluminio: a empresa ten beneficios. “Non estamos dacordo pois son causas xeradas ex profeso por parte da empresa para xustificar unha decisión tomada previamente”. Alcoa indica que tanto a fábrica de Avilés como a da Coruña son as menos productivas do grupo debido a “problemas estructurais” malia que as e os traballadores sosteñen que as factorías afectadas son «rendibles e gañan cartos».
Unha medida desproporcionada
A representación sindical ten claro que a empresa presenta agora “excusas” e “cortinas de fume” e que optaron polo despido colectivo antes de realizar inversións nas plantas supostamente ineficientes. Tanto é así que as e os traballadores aseguran que a propia multinacional norteamericana someteu á planta da Coruña a un abandono progresivo. A decisión estaba tomada desde hai moito tempo.
Cómpre agora preguntarse polos centos de millóns de euros en axudas públicas recibidos por Alcoa pagadas pola cidadanía a través das súas facturas. Axudas que, durante os últimos dez anos, ascenderían a máis de 1.000 millóns de euros. En todo caso, as chantaxes da empresa foron habituais durante os últimos anos: a cada anuncio ou ameaza de Alcoa con despedimentos foi respondido con inminentes subastas de enerxía por parte do Goberno central e que acababan satisfacendo os intereses da empresa.
Primeira manifestación
As e os traballadores da factoría da Coruña acordaron a convocatoria sunha manifestación para o vindeiro sábado, 20 de outubro. A marcha partirá da praza da Palloza ás 11 da mañá e rematará na Delegación do Goberno.
