Adif contratou a dedo por 14.900 euros ao despacho de avogados Hogan Lovells coa fin de asesorar aos comparecentes na Comisión de Investigación do Alvia no Congreso dos Deputados, encargado de examinar o ocorrido no accidente ferroviario do 24 de xullo de 2013. Neste bufete traballa o avogado que defende ao exdirector de Seguridade na Circulación Andrés Cortabitarte, imputado na causa ao que se lle vinculan 80 delitos de homicidio por imprudencia grave profesional e 144 de lesións, ao igual que o maquinista do tren.

Dende a Plataforma de Vítimas Alvia 04155 enmarcan isto nunha “estratexia do silencio” e lembran o caso do metro de Valencia. Neste accidente, a Generalitat foi acusada de adoutrinar aos comparecentes na investigación a través dunha consultora externa.

A eurodeputada do BNG, Ana Miranda, considera “inaceptable que eses traballos de asesoramento estiveran máis centrados en ocultar ou manipular a realidade que en esclarecer as causas do accidente máis grave acontecido en Europa nos últimos 25 anos”.