A Xunta aproveita as pintadas na Catedral para atacar ao Concello de Santiago

Pintadas na Catedral, outra vez. A catedral de Santiago foi descuberta esta mañá con varias pintadas

Compostela amenceu hoxe outra vez con pintadas na contorna da catedral, desta vez máis de unha. Podíase ler na Praza do Obradoiro a mensaxe “yo no salí de tu costilla, tú saliste de mi coño“, e no Arco de Palacios “Guillotina Borbón“, “Machitos” e “gritaremos ata quedarnos sin Vox“.

As reparacións comezaron esta mesma mañá e algunhas das mensaxes xa están repintadas ou cubertas, pero a polémica segue. Fai menos dun ano pasaba algo similar nunha estatua centenaria tamén da Catedral, e aínda que poden ser motivos “máis ou menos xustos”, como explica o alcalde, “hai que perseguir aos responsables”. O Goberno local xa está a traballar coa Catedral e coa policía para darlle soluición.

A Xunta, pola súa banda, tamén se manifestou ao respecto, pedindo que se coloquen cámaras na Praza para evitar estas actuacións. O Conselleiro de Cultura, Román Rodríguez, demandou ao Consorcio a instalación de videovixiancia, e comprometeuse a asumir o coste da instalación se o Goberno Local non o fai.

Martiño Noriega, en cambio, reforzou a súa posición de contrarrestar estes ataques ao patrimonio mediante o civismo e a concienciación social, e quixo lembrar que non recibiu aviso de Rodríguez e que se trata de políticas “desleais”. Tamén quixo facer referencia á gran forza do movemento feminista e ao “fraco favor” que lle fan estas actuacións.

- Publicidade -