A Rede Educativa LGBTIQ+ presentarase oficialmente esta tarde, ás 18 horas, no Centro Cívico Cidade Vella da Coruña para dar conta dos obxetivos desta iniciativa. Nestes momentos, a Rede está presente en máis de 25 centros educativos galegos como, por exemplo, o IES Politécnico, o IES Carlos Casares, o IES Ricardo Mella, o IES Os Rosais II de Vigo, o IES Agra de Orzán, o IES Eusebio da Guarda da Coruña, o IES Maruja Mallo de Ordes, o IES Xosé Neira Vilas de Oleiros, Io ES Punta Candieira de Cedeira, o CPR Andaina de Culleredo ou o IES Allariz.

O obxetivo desta Rede é combater os prexuízos LGBTIfóbicos existentes e que constitúen a base de condutas discriminatorias que poden culminar en situacións de violencia de xénero, acoso escolar homofóbico e delitos de odio, viñéronse creando nos últimos anos equipos de apoio LGBT en diferentes centros de ensino de Galicia.

Ana Ojea, cofundadora da Rede, comenta que “a importancia da Rede reside no feito de que é o propio profesorado do sistema educativo galego quen toma a iniciativa na defensa dos dereitos das persoas LGBT e a súa visibilidade nos centros educativos, loitando contra a discriminación e o acoso escolar LGBTIfóbico, construíndo escolas mais libres e seguras para todas as persoas integrantes das comunidades educativas”. Hai uns meses, Ana Ojea explicaba o proxecto ante as cámaras de Nós Televisión.

Nestes centros constituíronse asembleas de alumnado LGBT e deseñáronse actividades na procura da necesaria sensibilización, coñecemento e concienciación sobre a diversidade afectivo-sexual, a diversidade familiar e as diversas identidades de xénero, para lograr modificar as condutas fóbicas, e fomentar a participación e o exercicio da cidadanía como instrumentos imprescindibles para o libre e digno desenvolvemento humano, neste caso en materia de igualdade na diversidade. Na Rede Educativa de Apoio LGBTIQ+ de Galicia colaboran xa mais de 200 persoas do mundo da Educación.