Satisfacción na Deputación de Pontevedra polos datos de ocupación hostaleira na provincia na pasada ponte das Letras Galegas. Segundo deu a coñecer a presidenta da Deputación, Carmela Silva, os establecementos chegaron a ter un 65%.
A comarca que mantivo a porcentaxe máis elevada foi Caldas co 86%, seguida de Pontevedra co 76%, da comarca do Morrazo co 73%, Vigo co 72% e O Salnés co 65%. As comarcas do Condado e A Paradanta acadaron o 51% de ocupación hoteleira, Deza e Tabeirós-Terra de Montes o 48% e a comarca do Baixo Miño o 47,6%. En canto ao turismo rural a ocupación, tal e como asegurou a presidenta provincial, ascendeu ao 33%.
Record de visitas en Soutomaior
O castelo de Soutomaior batiu record estes días. A primeira fin de semana da xornada de portas abertas superábanse as 1.000 visitas e nesta ponte chegaron ás 3.000 as persoas que acudiron ata Soutomaior procedentes de diferentes lugares da xeografía galega e do estado.
Carmela Silva anima á cidadanía a “coñecer o vangardista proxecto de musealización inaugurado a semana pasada xa que, ata o 25 de maio, mantemos as xornadas de portas abertas gratuítas”.
