‘A noite do corvo’, unha intrigante novela de ficción con alusións a Galicia

Conversamos co seu autor, Abel Tomé, quen debulla a trama dun relato que comeza co asasinato de catro membros dunha mesma familia

Catro membros da familia Haggerty aparecen brutalmente asasinados na Casa do Faro da illa de Gothard. Así comeza A noite do corvo, a primeira novela do xornalista Abel Tomé. Trátase dunha intrigante historia que pon o foco sobre o tenente de policía Gonçalves, quen deberá investigar o crime.

O axente será axudado na súa tarefa polos seus compañeiros Pietre, “un home solitario cunha obsesión enfermiza polo sexo”, e Lúa, “exemplar e inocente, obrigada a coidar dun pai enfermo”. A trama combínase coa hostilidade e a mitoloxía que arrodean a Gothard, unha “vila ancorada no medievo”.

Influencia das culturas celta e lusófona

O propio autor admite os “tintes persoais” que verteu sobre esta historia de ficción na que abondan os nomes ingleses, irlandeses e portugueses, nunha clara alusión ás influencias culturais celta e lusófona de Galicia. Tomé considera “imprescindible” dar pulo á literatura en galego, xa que el mesmo asegura non entender Galicia sen a súa lingua. O escritor fai especial fincapé na “esencia tradicional” da lingua, salientando características como a gheada ou o seseo que el considera “eróticas”.

- Publicidade -