A Marea Atlántica quere que se devolvan as retribucións do pleno da Autoridade Portuaria

Consideran unha “burla” que cobren os dez membros do consello que aprobaron a venda dos terreos da Solana e o Hotel Finisterre “con fins especulativos”

A Marea Atlántica pediu que o resto de membros que asistiron ao Consello de Administración da Autoridade Portuaria da Coruña do 22 de decembro de 2016 na que se aprobou a venda dos terreos da Solana e o Hotel Finisterre sigan o camiño do concelleiro de Rexeneración Urbana do Concello da Coruña, Xiao Varela, e renuncien ás dietas.

- Publicidade -

A medida coincide coa práctica habitual desta formación e consideran que neste caso deberían tela en conta o resto de partidos. Nesa data as dez persoas que asistiron ao pleno recibiron 747,88 euros brutos por cabeza por aprobar unha medida que, desde Marea Atlántica, consideran especulativa.

7.478,80 euros

Segundo denuncian desde Marea Atlántica aquela xuntanza custoulle ao Porto da Coruña 7.478,80 euros en cartos públicos, unha cantidade que consideran “esaxerada e innecesaria”. A reunión durou dúas horas e o seu custe revelouse logo dun ditame do Consello Estatal de Transparencia e Bo Goberno, previa solicitude, obrigou a revelar esta información.

Marea Atlántica tamén facilita a listaxe de beneficiarios destas dietas, entre eles varios altos cargos de gobernos do PP, como a conselleira de Medio Ambiente, Beatriz Mato; o delegado do Goberno na Coruña, Jorge Atán; o alcalde de Arteixo, Carlos Calvelo; a secretaria xeral do Mar da Xunta de Galicia, María Isabel Concheiro; a delegada da Xunta na Coruña, Belén Docampo e o representante de Puertos del Estado, Álvaro Mora.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego