Os orzamentos participativos impulsados polo Concello de Santiago comezan dar os seus froitos. Este martes, os concelleiros Rafael Peña e María Rozas visitaron dúas das actuacións realizadas no marco deste programa. Unha das máis solicitadas pola cidadanía compostelá fora a construción dunha senda cuberta que conectase o CEIP Lamas de Abade coa Escola de Hostalería, na que o alumnado dispón do servizo de comedor.
A parroquia de Marrozos foi outra das grandes protagonistas neste proceso de participación cidadá. O Concello destinou, por petición popular, 60.000 euros para a ampliación e mellora do campo da festa, un espazo moi empregado pola veciñanza para a celebración de diferentes eventos.
Máis obras
Así e todo, o Concello prepara outra actuación sobre o campo da festa que se desenvolverá ao longo do verán: a reforma íntegra do palco e as instalacións que o compoñen, co obxectivo de converter Marrozos nunha parroquia “dinámica” e “atractiva” para a cidadanía.
